کشمیر کی ریاستی حیثیت کی بحالی کسی بھی صورت میں بھارت کے 2019 کے اقدامات کی ناکامی کی علامت ہوگی: آئی پی ایس فورم

مقبوضہ جموں و کشمیر کی ریاستی حیثیت کی بحالی کا امکان ابھی غیر یقینی ہے، ایسا کوئی بھی اقدام 5 اگست 2019 کے بعد سے بھارت کے یکطرفہ اقدامات کے کمزور پڑنے کی نشاندہی کرے گا۔ بھارت کے اندرونی انتشار، بڑھتی ہوئی بین الاقوامی تنقید اور عالمی طاقتوں کے بدلتے ہوئے رویے کے پیش نظر ایک نیا رجحان سامنے آیا ہے۔ بھارت کشمیر پر اپنا بیانیہ از سر نو تشکیل دے کرنئی  صورت حال میں فائدہ اٹھانے کی کوشش کرے گا۔ تاہم، پاکستان کو واضح سوچ اور حکمت عملی کے ساتھ  کشمیریوں کے حق خودارادیت کے حصول کے لیے بیانیہ کو آگے بڑھا نا ہے ۔

ان خیا لات کا اظہار مقررین نے ” مقبوضہ جموں و کشمیر کی ریاستی حیثیت بحال کرنا: ایک قدم آگے یا سیاسی فریب؟” کے عنوان سےآئی پی ایس  میں  ۴ اگست ۲۰۲۵ کو منعقدہ سمینار میں کیا۔ آئی پی ایس کے ورکنگ گروپ برائے کشمیر کے اس سمینار میں آئی پی ایس کے چیئرمین خالد رحمان، وائس چیئرمین اور سابق سفیر سید ابرار حسین، ڈائریکٹر جنرل انسٹیٹیوٹ آف ملٹی ٹریک ڈائیلاگ، ڈویلپمنٹ اینڈ ڈپلومیٹک اسٹڈیز ڈاکٹر شیخ ولیدرسول ، ورکنگ گروپ برائے کشمیر کی سیکرٹری جنرل فرزانہ یعقوب، آئی پی ایس کے ایسوسی ایٹ ڈاکٹر خورشید خان، سابق سفیر نصر اللہ خان، بین الاقوامی امور کے ماہر برگیڈیئر (ر) راجہ شوزب مجید ، اور تجزیہ کار برگیڈیئر (ر) سید نذیر نے خطاب کیا۔

ڈاکٹر ولید رسول نے کہا کہ 1947 سے بھارتی غیر قانونی زیر قبضہ کشمیر کی جدوجہد اصل کنٹرول اور قانونی کنٹرول کے درمیان رہی ہے۔ جب یہ علاقہ بھارتی فوجی کنٹرول میں آیا تو بھارت نے قانونی اور عملی سطح پر ہیر پھیر شروع کر دیا۔ کشمیر کی خصوصی حیثیت کا خاتمہ متعدد قانونی فریم ورکس کی خلاف ورزی ہے، جن میں انڈین انڈیپنڈنس ایکٹ، اقوام متحدہ کی سلامتی کونسل کی قراردادیں، دوطرفہ معاہدے، اور آرٹیکل 370 کے تحت آئینی ضمانتیں شامل ہیں۔ انہوں نے زور دیا کہ پاکستان کو کشمیر کے مسئلے کو مختلف فورمز پر اٹھانے کی ضرورت ہے۔ ساتھ ہی بین الاقوامی سیاسی، انسانی اور قانونی فورمز پر کشمیر کی قانونی حیثیت کے بارے میں آگاہی بڑھانا بھی ضروری ہے۔

اس کے قانونی اور تاریخی پہلوؤں کو اجاگر کرتے ہوئے بریگیڈیئر (ر) خورشید خان نے کہا کہ بھارت کشمیر میں وسیع پیمانے پر انسانی حقوق کی خلاف ورزیوں کا ارتکاب کر رہا ہے، لیکن یہ مظالم زیادہ تر رپورٹ نہیں ہو رہے ہیں۔ تاہم، مئی میں پاکستان اور بھارت کے درمیان ہونے والے حالیہ تصادم نے کشمیر کے مسئلے کو ایک بار پھر بین الاقوامی سطح پر نمایاں کر دیا ہے، جس سے نئی جغرافیائی حقیقتیں سامنے آئی ہیں۔ عالمی طاقتیں اب یہ تسلیم کرتی ہیں کہ بھارت اور پاکستان کے درمیان کوئی بھی تنازعہ بین الاقوامی امن کے لیے سنگین خطرہ ہے۔ انہوں نے کہا کہ پاکستان کو تنازعات کے پرامن حل کے لیے حال ہی میں منظور ہونے والی اقوام متحدہ کی قرارداد کو سفارتی سطح پر فعال انداز میں اٹھانے کے لیے فعال طور پر استعمال کرنا چاہیے۔

بریگیڈیئر (ر) شوزب نے کہا کہ فلسطین ایک ٹیسٹ کیس ہے، اور بھارت کشمیر میں اسی طرز کا ماڈل اپنانے کی کوشش کر سکتا ہے۔ تاہم، انہوں نے کہا کہ مئی کے بعد بھارت کی دعویٰ شدہ بالادستی شدید متزلزل ہوئی ہے۔ یہ بدلتی ہوئی صورتحال پاکستان کو جنوبی ایشیائی تناظر میں اپنے حق میں موڑنے کا ایک موقع فراہم کرتی ہے۔ انہوں نے کشمیر کے مسئلے پر عالمی عدالت انصاف سے رائے لینے، بین الاقوامی رائے عامہ میں تبدیلی کو استعمال کرنے، تھنک ٹینکس کے ساتھ مشغول ہونے، اور متاثرین کے دستاویزی مراکز قائم کر کے دستاویزی فلموں کے ذریعے بھارتی مظالم کو بے نقاب کرنے کی تجویز کی۔

بریگیڈیئر (ر) سید نذیر نے دفاعی پہلو پر روشنی ڈالتے ہوئے کہا کہ پاکستان نے بھارت کی نامناسب جارحیت کے جواب میں اپنی ساکھ مؤثر طریقے سے بحال کر لی ہے۔ انہوں نے خبردار کیا کہ اگر بھارت اسے معمول کے طور پر دیکھتا ہے تو یہ نئی دہلی کے لیے بھاری قیمت پر ہوگا۔

سابق سفیر ابرار حسین نے کہا کہ 5 اگست 2019 کو کیے گئے اقدامات آئینی اور بین الاقوامی قانون دونوں کے تحت غیر قانونی تھے۔ بی جے پی کا خیال تھا کہ آرٹیکل 370 کو ختم کرنے سے کشمیری عوام بھارت کے سامنے جھک جائیں گے۔ تاہم، پہلگام واقعہ اور اس کے بعد کے حالات نے کشمیر کے مسئلے کو ایک بار پھر نمایاں کر دیا ہے، جس سے اس کے بین الاقوامی حل کی آوازوں میں اضافہ ہوا ہے۔

خالد رحمان نے کہا کہ 5 اگست 2019 کے بعد ایک اہم پیش رفت یہ ہے کہ بھارت سفارتی اور استعماری طور پر بے نقاب ہوا ہے، جس کی وجہ سے بدلتے ہوئے علاقائی اور عالمی حالات میں اسے کسی حد تک تنہائی کا سامنا ہے۔ چاہے اس کے نتیجے میں کشمیر کی ریاستی حیثیت بحال ہو یا پھر بھارتی زیر قبضہ کشمیر کو دو الگ ریاستوں میں تقسیم کر دیا جائے، یہ ابھی واضح نہیں۔ تاہم، انہوں نے زور دیا کہ پاکستان کو اس بدلتی ہوئی صورتحال کو آگے بڑھاتے ہوئے کشمیریوں کے حق خودارادیت کی وکالت کو تیز کرنا ہوگا۔