منیب الرحمن

مفتی منیب الرحمن رویت ہلال کمیٹی پاکستان کے چیئرمین ہیں اور ملک کے چوٹی کے مذہبی اسکالرز میں ان کا شمار ہوتا ہے۔ انہوں نے کراچی یونیورسٹی سے اسلامک اسٹڈیز میں ماسٹرز کیا اور اسلامی علوم اور فقہ کی تعلیم دارالعلوم امجدیہ سے حاصل کی۔ اپنی پیشہ ورانہ زندگی میں وہ متعدد اہم ذمہ داریوں پر فائز رہے ہیں جن میں تنظیم المدارس کے صدر اور دارالعلوم نعیمیہ کراچی کے صدر کی ذمہ داریاں بھی شامل ہیں۔ وہ جناح یونیورسٹی برائے خواتین کراچی میں تدریسی فرائض انجام دیتے ہیں نیز وفاقی حکومت اردو یونیورسٹی اور ثانوی تعلیمی بورڈ کراچی کے بورڈ آف اسٹڈیز کے بھی رکن ہیں۔ مختلف تعلیمی اداروں میں گریجویشن اور پوسٹ گریجویشن طلبہ کو تفسیر، حدیث، فقہ، عربی ادب اور دیگر اسلامی علوم پڑھانے کا تیس سال سے زائد کا تجربہ رکھتے ہیں۔ مصنف کی حیثیت سے ان کی متعدد کتب ہیں جن میں تفہیم المسائل قانونِ شریعت، اصول فقہ اسلام خاص طور پر قابل ذکر ہیں۔