پڑوسی ممالک کے ساتھ اچھے تعلقات ملک کے استحکام، ترقی کے لیے ضروری ہیں: وائس چئیرمین آئی پی ایس

وائس چئیرمین آئی پی ایس سابق سفیر سید ابرار حسین نے 16 فروری 2025 کو قرطبہ یونیورسٹی آف سائنس اینڈ ٹیکنالوجی، پشاور کے زیر اہتمام ایک سیمینار بعنوان ‘پاکستان کی خارجہ پالیسی کا نظریاتی تعین کرنے والے عناصر’ میں کلیدی خطاب کیا۔

ایک سابق سفیر اور کیریئر ڈپلومیٹ کے طور پر حسین نے اس بات پر زور دیا کہ ہمسایہ ممالک کے ساتھ خوشگوار تعلقات پاکستان کے استحکام اور ترقی کے لیے ضروری ہیں۔ انہوں نے کہا کہ اپنے ہمسایہ ممالک، بالخصوص افغانستان اور ایران کے ساتھ مضبوط تعلقات کو فروغ دینا پاکستان کے بہترین مفاد میں ہے کیونکہ ان تعلقات کے بغیر پاکستان کو بڑے چیلنجز کا سامنا کرنا پڑے گا۔

حسین نے کہا کہ پاکستان کی خارجہ پالیسی اس کے اسلامی تشخص میں پیوست ہے، جسے قائداعظم محمد علی جناح کے ویژن اور پاکستانی عوام کی اجتماعی دانش سے تقویت ملتی ہے۔

سابق سفیر نے ماضی میں امریکہ اور سابق سوویت یونین دونوں کے ساتھ ملک کے مثبت تعلقات کا حوالہ دیتے ہوئے عالمی سپر پاورز کے ساتھ متوازن خارجہ پالیسی کو برقرار رکھنے کے لیے پاکستان کے عزم پر بھی تبادلہ خیال کیا۔

سپیکر نے زور دے کر کہا کہ معاشی اور دفاعی کمزوریاں کسی قوم کو اپنی خارجہ پالیسی میں سمجھوتہ کرنے پر مجبور کر سکتی ہیں، اس لیے پاکستان کے لیے ایک آزاد خارجہ پالیسی پر عمل پیرا ہونے کے لیے دفاعی اور اقتصادی شعبوں میں خود کفیل ہونا ناگزیر ہے۔