پالیسی پرسپیکٹیوز (Policy Perspectives)
مدیر : خالدرحمٰن
نائب مدیر : عرفان شہزاد
’’پالیسی پرسپیکٹیوز‘‘ آئی پی ایس کا ششماہی تحقیقی جریدہ ہے۔ ادارہ میں یا اس سے وابستہ افراد کے ذریعے سامنے آنے والا تحقیقی کام اس جریدہ میں پیش کیا جاتا ہے۔ اصل تحقیقی مقالات کے ساتھ ساتھ اس میں متنوع مسائل و معاملات پر تجزیاتی اور خیال افروز تحریریں بھی شامل ہوتی ہیں ۔ جریدے کے مشتملات علمی، تحقیقی اور متعلقہ پیشہ ورانہ حلقوں میں دلچسپی سے پڑھے جاتے ہیں۔
نقطہ نظر
مدیر : ڈاکٹر سفیراختر
”نقطہ نظر “ اردو ششماہی جریدہ ہے، جس میں کتابوں پر تبصرہ کیا جاتا ہے۔ اسلام، ثقافت، تاریخ، مسلم دنیا اور اس سے متعلقہ مباحث پر پاکستان میں اردو میں شائع ہونے والی کتابیں اس کا موضوع ہیں۔ اکتوبر ۱۹۹۶ء سے شائع ہونے والے اس جریدہ نے پاکستانی مسلمانوں کے نظریات، روایات اور مسائل ومشکلات کے بارے میں سامنے آنے والے علمی کام کو سمجھنے اور اس کا شعور عام کرنے میں اہم کردار ادا کیا ہے۔ ایک عام قاری کے لیے یہ جریدہ بنیادی مباحث کی تفہیم کے ساتھ ساتھ دستیاب مآخذ اور مصنفین تک رسائی کو آسان بناتا ہے۔
مغرب اور اسلام
مدیر: ڈاکٹر انیس احمد
مدیر معاون: متقین الرحمٰن
’مغرب اور اسلام‘ ادارہ کا اردو جریدہ ہے جو مغرب اور اسلام کے درمیان رونما ہونے والے اہم علمی و فکری مباحث نیز سیاسی، سماجی، معاشی اور علمی و تہذیبی تعلقات کے اُمور کا احاطہ کرتا ہے۔ اس میں مغربی مصنفین کے اسلام اور مسلمانوں کے بارے میں پیش کیے گئے اہم خیالات کا ترجمہ بھی پیش کیا جاتا ہے اور مسلم مفکرین اور اہلِ دانش کے خیالات بھی پیش کیے جاتے ہیں۔ اپریل ۱۹۹۷ء میں جاری ہونے والے اس جریدہ کو پاکستان اور دنیا بھر میں موجود اہلِ علم اردو خوان طبقے میں دلچسپی سے پڑھا جاتا ہے۔ یہ جریدہ دنیائے اسلام کے بارے میں امریکی اور یورپی اسکالرز کے نقطہ نظر کو سمجھنے، ”تہذیبوں کے تصادم“ کی روک تھام اور تعمیری اور مثبت مکالمہ کے فروغ کے لیے حصہ ادا کرتا ہے۔
آئی پی ایس نیوز (IPS News)
مدیر : نوفل شاہ رخ
آئی پی ایس نیوز ادارہ کا سہ ماہی نیوز لیٹر ہے، جس میں ادارہ کی تمام اہم سرگرمیوں کا احاطہ کیا جاتا ہے۔ ادارہ میں ہونے والی تمام علمی سرگرمیوں جیسے سیمینار، کانفرنسیں، رابطے، مکالمے، متنوع موضوعات پر گول میز مذاکرے اور انسانی وسائل کی نشوونما اور تربیت سے متعلق پروگرامات کی خبریں اور رپورٹس اس میں شامل ہوتی ہیں۔ ادارہ کی نئی مطبوعات کا تعارف بھی اس ذریعے سے سامنے آتا ہے۔
